Henrico Coetzer stel nuwe musiekvideo bekend

 

Henrico Coetzer het pas die musiekvideo vir sy enkelsnit, Soos Reën, bekendgestel!

Die liedjie, Soos Reën speel reeds vir ‘n geruime tyd op radiostasies landswyd en nou is die musiekvideo ook bekendgestel!  Henrico verklap dat dit in die aand geskiet is en dat dit nogal koud was. Hy is egter baie opgewonde oor die eindresultaat en sien uit daarna om dit nou met die publiek te deel. Die tema van die musiekvideo is eintlik baie eenvoudig. Dit is ek wat in ’n ou, verlate sitkamer sit en klavier speel. Maar skielik begin dit reën in die kamer. Dit was vir my so lekker om soveel mense om my te hê wat my ondersteun en help met my droom. Ek droom al vandat ek vyf is daaroor om ’n musiekvideo op te neem,” vertel hy.

Daar het geen twyfel bestaan dat Henrico Coetzer (23) sy nuwe liedjie, Soos Reën, moet sing nie. Só het die bekroonde sanger, Joshua Na Die Reën, gedink toe hy die nuweling van Pretoria die eerste keer hoor sing het.

Henrico het nie gras onder sy voete laat groei nie en dadelik ingestem. ’n Paar weke later was hy in die opname-ateljee en kort daarna is dié treffer ampetlik vrygestel en baie goed ontvang. Vandag pronk dit op die Top 20-treffersparades van byna elkeen van die nege-en-twintig radiostasies wat dit gereeld speel en bekleë dit die nommer twee posisie op East Rand Stereo se trefferlys.

“Dis ’n voorreg as iemand met ’n mooi stem ’n liedjie wil sing wat ek geskryf het. Henrico is iemand wat baie kan toevoeg tot die Afrikaanse musiekbedryf,” sê Joshua Na Die Reën.

Vir Henrico was dit ’n groot eer om die liedjie te sing. Hy het sangopleiding gekry by die sanger, Chris Coetzer (Drie Tenore) en sedert hy 18-jaar oud is open hy gereeld vertonings vir gewilde sangers soos Bobby van Jaarsveld, sy sussie Karlien, Theuns Jordaan en Corlea Botha om maar net ’n paar te noem. En dis juis by een van Bobby se vertonings dat sy pad met Joshua Na Die Reën gekruis het. By dié spesifieke vertoning het Joshua Na Die Reën vir Bobby op die klavier begelei en dadelik vir Henrico raakgesien. 

“Ek was oppad huis toe, en toe ek weer sien klop hy aan my kar se venster. Ek het oopgemaak en toe vertel hy my dat hy ’n nuwe liedjie geskryf het, Soos Reën, en hy dink dit sal perfek werk met my stem,” sê Henrico. 

Henrico kon sy ore nie glo nie en kort voor lank was hy besig om “…want jy is vir my soos reën op die vlakte van my siel wat liefde nooit geken het nie… toe vang jy my toe ek wil val…” te sing in studio. Hier is ’n lusmaker van die liedjie:  https://soundcloud.com/starburstpromotions/henrico-coetzer-soos-reen-teaser

“Ek is mal oor die lirieke van Soos Reën. Dis heeltmal iets anders. Dis nie net ’n liedjie nie, dis ’n gedig en vertel ’n storie. Dit kan vir elkeen wat dit hoor iets anders beteken. Ek wil musiek maak wat mense se harte aanraak,” sê Henrico wat van kleins af hou van dig.

Die treffer is deel van sy tweede CD, Dis wie ek is… wat verlede jaar opgeneem is. Buiten Joshua Na Die Reën, is daar ook lirieke deur Bobby van Jaarsveld, Johan Oberholzer, Hilandi du Toit en natuurlik Henrico self. “Die album sê wie ek is, en elke liedjie kom van diep uit my hart. Sonder enige pretensie,” sê Henrico, wat nie net sag op die oor is nie, maar ook op die oog.

Die sanger het die afgelope paar maande geleer dat die musiekbedryf nie maklik is om in te werk nie en dat sukses nie oornag gebeur nie, maar het reeds ’n paar hoogtepunte beleef, waaronder ’n optrede saam met Corlea Botha by Emperor’s Palace en verskeie vertonings by die Innibos-fees, om ’n paar te noem.

As jy hom vra wie hom inspireer, antwoord hy dadelik dat Josh Groban al van kleins af sy rolmodel is. “Hy is vir my ongelooflik en baie talentvol. Ghapi is my Suid-Afrikaanse inspirasie. Hy is ’n ongelooflike persoon wat soveel respek het vir opkomende kunstenaars. Hy is ’n mense mens en ek het die wêreld se respek vir hom,” verklap die sanger. Hy sou ook nog graag eendag saam met Monique ’n liedjie wil opneem en hoop om binnekort ’n draai te maak by Skouspel of Afrikaans is Groot.

DIE MENS AGTER DIE STEM

As kannetjie van vyf het hy sy ouers al gewaarsku – sing gaan hy eendag sing. En dié eendag is nou. “Dis my passie en al wat ek nog altyd wou doen,” vertel Henrico wat as kind gereeld vertonings aanmekaar gesit het wat hy en sy sussie moes opvoer.

“Talente word nie sommer net vir jou gegee nie. Dis jou verantwoordelikheid om dit te ontwikkel en te gebruik.”

En nee dames, die sexy man is nog nie opgeraap nie… Maar van een ding kan ons seker wees, hy gaan nog baie knieë lam maak. Daaroor bloos hy net en skud sy kop. Buiten sing is die ding wat hom regtig gelukkig maak om ander te help. “Ek glo dis belangrik om jou deel vir liefdadigheid te doen en probeer om elke nou en dan iewers ’n show te doen.”

En so dóén hy gereeld, veral by die Cansa-aflosmarathonne, waar hy die man is wat almal se lam bene aan die gang hou tot by die eindstreep. Liefhebbers van die gewilde Blouhond-teater in Pretoria, sal hom ook herken, aangesien hy gereeld daar optree. Hy was ook deel van die ensamble in die musiekblyspel, Droomkind, waarin Bobby van Jaarsveld die hoofrol vertolk het.

Maar sing is nie al wat die jongman kan doen nie. Van kleinsaf is hy baie goed met teken en skilder en is op skool met talle pryse vir sy kreatiwiteiet beloon, ook vir sy digkuns.

So ’n bek moet mos jêm kry? En op sy bek is hy nie geval nie. “Ek het op skool redenaars gedoen en in matriek die ATKV-toekenning gekry vir redenaar van die jaar,” vertel hy trots.

Maar vir redeneer het hy nou nie meer lus nie. Hy wil net sing, of dit nou die opera-treffer, Nessun Dorma is, of Soos Reën, spits jou ore, want van Henrico Coetzer gaan ons nog baie hoor.

SOSIALEMEDIASKAKELS 

Facebook: https://www.facebook.com/Henrico-288839707819172/?fref=ts
Twitter: @Henrico_Coetzer
Instagram:  Henrico_Coetzer

Comments are closed.